|
|
|
KRUS DI MÉRITO: Kòrsou su distinshon máksimo
Kiko ta Krus di Mérito?
Krus di Mérito Kòrsou ta un kondekorashon instituí pa Gobièrnu Insular di Kòrsou, pa duna rekonosimentu na personanan ku a desplegá aktividatnan meritorio, den un forma partikular, pa komunidat di Kòrsou. Krus di Mérito Kòrsou, ta e manera ku Kòrsou ta rekonosé dignamente su baluartenan, durante di nan bida.
 For di 22 di mart 1999 Teritorio Insular di Kòrsou a saka e dekreto ku ta regla entrega di e rekonosementu máksimo ku un suidadano por risibí di Gobièrnu di Kòrsou: e kondekorashon di “Krus di Mérito”. E distinshon aki, for di aña 2004, a keda entregá tur aña riba Dia di Bandera, na personanan ku a hasi trabounan meritorio, banda di nan mes trabou, hasiendo sakrifisio máksimo sin wak interes personal.
Kiko ta e kriterionan pa Krus di Mérito?
E kriterionan ku un persona mester kumpli kuné pa por keda nominá komo kandidato pa risibí Krus di Mérito ta lo siguiente:
1. E nominado mester ta un habitante inskribí na Kòrsou
2. E nominado mester ta un persona mayor di 50 aña
3. E nominado mester a hasi su mes eksepshonalmente i partikularmente meritorio pa un temporada mínimo di 5 aña largu
4. E nominado mester a hasi diferente trabou ku a eksihí un esfuerso personal grandi di dje ku a duna komo resultado desaroyonan di balor haltu pa e komunidat di Kòrsou
5. E nominado su trabounan mester a kontribuí na edifikashon síviko.
6. Mester tin prueba palpabel di e aktividat i prestashonnan aki.
7. E nominado mester ta di un komportashon ehemplar
Ken por proponé un kandidato?
Tur adulto mayor di edat ku tin nashonalidat hulandes i ta establesé na Kòrsou por presentá kandidato pa bin na remarke pa haña Krus di Mérito. E proposishon mester kontené un biografia di e kandidato i un deskripshon di e motibunan pakiko ta proponé e persona komo nominado pa Krus di Mérito. Mester menshoná tambe e periodo den kua e persona a desplegá e aktividatnan meritorio.
Kon pa proponé un kandidato?
Riba e página di wep aki tin un opshon pa download un formulario kaminda por yena tur informashon di tip, relevante pa loke ta trata presentashon di un nominado, pa haña kondekorashon Krus di Mérito. Mester entregá e formulario aki na Servisio di Kultura i Edukashon na Scharlooweg 102, promé ku 14 di mei 2010. Huntu ku e formulario mester entregá un potrèt resien saká, di bon kalidat di e nominado.
E formulario tambe ta optenibel na Servisio di Kultura i Edukashon, Scharlooweg 102 i na Bentana di Informashon, na Breedestraat Punda 39C.
Ken ta disidí riba un proposishon?
Komishon di Kondekorashon Krus di Mérito ta konsistí di 9 persona (representando 9 sektor di nos komunidat), ku ta asesorá Kolegio Ehekutivo den e tareanan pa selektá e kandidatonan pa nominashon. E komishon ta hasi esaki basá riba e kriterionan stipulá. E komishon akí ta kai bou di Servisio di Kultura i Edukashon.
E komishon ta konsisti di:
a. Sra.Susan Larmonie- v.Heydoorn, Presidente, sektor Kultural-Edukativo.
b. Sra. Daisy Frans-Schoop, sektor Sosial-Kurativo.
c. Sr. Gilbert Kraal, sektor Ekonomiko.
d. Sr. Armin Elisa, sektor Konseho di Iglesia.
e. Sr. Amerigo Thodé, sektor Komersio i Industria.
f. Sr. Rignald Maduro, sektor Medio di komunikashon.
g. Sr. Armand Hellement, sektor Konseho di Hubentut.
h. Sra. Shirley Martis-Treurniet, sektor Konseho di Grandinan.
i. Un representante di Servisio pa Komunikashon i Informashon
Ken ta e hendenan ku a risibí un Krus di Mérito den e añanan anterior?
2004 sra. Imelda Valerianus (q.p.e.d.), Pader Amado Römer i sr. Elis Juliana
2005 sra. Irma van der Biest, sra. Elsa Martijn i Broeder Theodorus Derksen
2006 sra. Amintha Sprockel, sr. Marcel de Palm i sra. Mildred (Mila) Palm
2007 sra. Myrna Dovale, sra Isidra Bregita i Maria Carolina (Riet) Rozendaal
2008 sra. Jamilie Haile, sra. Cornellie Schoonhoven-Muntslag,
sra.Imelda Agostien, sr. Lucio Romero, sr. Ruben Roosberg
2009 sra. Gertrudis Calister-Petronia, Sr.Frank Curiël, Sra. Mildred Clara (QEPD),
sr. Armando Correa, Sr. Francisco Paulina.
Pa mas informashon por tuma kontakto ku sekretariado di Komishon Krus di Merito: sra. Sonaline George òf sra. Carmen Cuffy na telefòn: 461 – 5133 òf Fax: 461 – 5320 òf lesa e foyeto Krus di Mérito di Gobièrnu di Kòrsou.
Download aki: Formulario pa Prensentá Nominado | Folder Krus Merito 2010
|
|
|
|