27 yüli 2010 - DIPUTADO ANTHONY A. GODETT A INSPEKSHONA TRABOUNAN INFRASTRUKTURAL DEN KURA PIEDRA
Servisio pa Komunikashon i Informashon di Gobièrnu di Kòrsou ta informá ku resientemente Diputado enkargá ku entre otro infrastruktura Sr. Anthony A Godett a hasi un bishita di trabou na diferente proyekto ku ta den ehekushon.
Entre otro Diputado Anthony A. Godett a realisá un bishita den e bario di Kura Piedra. Aki Diputado Anthony A. Godett a inspekshona trabounan di limpiesa di roinan ku ta tumando lugá. Na e okashon aki, e mandatario a tuma nota ku e trabounan a kana bastante lihé i ku sigur e kontratista lo kaba den e tempu programa.
Diputado Anthony A. Godett a splika tambe ku pronto e kaya prinsipal ku ta kore di Kabo Verdeweg te na skolnan di Kura Piedra lo keda asfaltá despues di 35 aña. Pronto e habitante i pueblo di Kòrsou lo bai disfrutá di un kaya nobo nobo asfaltá.
Potrèt: Aki por mira momentu ku Diputado Anthony.A.Godett ta inspekshonando e trabounan ku na e momentunan aki ta keda realisá na Kura Piedra.
|